ಮಕ್ಕಳ ಕವಿತೆ - ಅಮ್ಮ (ಲೇ :- ಚಾಜು ನಾಯ್ಕ)

ಮಕ್ಕಳ ಕವಿತೆ
" ಅಮ್ಮ "

ಅಮ್ಮ ಅಮ್ಮ ನನ್ನಮ್ಮ
ಬಿಸಿ ಬಿಸಿ ಪಾಯಸ ಹಾಕಮ್ಮ
ದುಂಡನೆ ಲಾಡು ತಾರಮ್ಮ
ಗಸಗಸೆ ಪಾಯಸ ಬೇಕಮ್ಮ

ಅಮ್ಮ ಅಮ್ಮ ಬಾರಮ್ಮ
ಆಟ ಅಡೋಣ ಬಾರಮ್ಮ
ಗೋಲಿ ಗಜಗ ತಾರಮ್ಮ
ಕ್ರಿಕೇಟ ಬ್ಯಾಟು ಬೇಕಮ್ಮ

ಅಮ್ಮ ಅಮ್ಮ ಹೇಳಮ್ಮ
ಸಣ್ಣನೆಯ ಕತೆಯು ಹೇಳಮ್ಮ
ರೋಚಕತೆಯು ನೀಡಮ್ಮ
ಕಂದನಿಗೆ ಒಳ್ಳೆಯ ಮೌಲ್ಯವ ಬೇಕಮ್ಮ

ಅಮ್ಮ ಅಮ್ಮ ಕೇಳಮ್ಮ
ನಾನು ಹೊಲಕ್ಕೆ ಬರುವೆನಮ್ಮ
ಕುಂಟಿಯ ಮೇಲೆ ಕುರುವೆನಮ್ಮ
ಅಪ್ಪನ ಜೊತೆಯಲ್ಲಿ ಇರುವೆನಮ್ಮ

ಅಮ್ಮ ಅಮ್ಮ ಪ್ರೀತಿಯ ಅಮ್ಮ
ನಾನು ಸಂತೆಗೆ ಬರುವೆನಮ್ಮ
ಬಣ್ಣದ ಬುಗುರಿ ತರುವೆನಮ್ಮ
ಪೆಪ್ಪರಮೆಂಟು ಕೇಳುವೆನಮ್ಮ

ರಚನೆ : ಚಾರೇನಾರಾ ಜೀವಾ
(ಚಾಜುನಾಯ್ಕ ಶಿಕ್ಷಕರು
9916863338)

ಗೆಲುವು

*ಗೆಲುವು*

ಹತ್ತು ಹತ್ತು ಇಪ್ಪತ್ತು
ಓಟದ ಆಟವು ನಡೆತಿದ್ದು|

ಇಪ್ಪತ್ತು ಹತ್ತು ಮುವತ್ತು
ಆಮೆ ಮೊಲಕೆ ಓಟವು ನಡೆದಿತ್ತು

ಮುವತ್ತು ಹತ್ತು ನಲವತ್ತು
ಮೊಲವು ಓಟದಿ ಮುಂದಿತ್ತು

ನಲವತ್ತು ಹತ್ತು ಐವತ್ತು
ಆಮೆಯು ಮೆಲ್ಲಗೆ ನಡೆದಿತ್ತು

ಐವತ್ತು ಹತ್ತು ಅರವತ್ತು
ಮೊಲವು ಮರದಡಿ ಮಲಗಿತ್ತು

ಅರವತ್ತು ಹತ್ತು ಎಪ್ಪತ್ತು
ಆಮೆಯು ಗುರಿಯನು ಮುಟ್ಟಿತ್ತು

ಎಪ್ಪತ್ತು ಹತ್ತು ಎಂಬತ್ತು
ಮೊಲಕೆ ಎಚ್ಚರವಾಗಿತ್ತು

ಎಂಬತ್ತು ಹತ್ತು ತೊಂಬತ್ತು
ಆಮೆಯು ಆಟದಿ ಗೆದ್ದಿತು

ತೊಂಬತ್ತು ಹತ್ತು ನೂರು
ಈಕಥೆ ನೀತಿಯ ಸಾರು ||

✍ವೆಂಕಟೇಶ ಚಾಗಿ
ಲಿಂಗಸುಗೂರ

ಇಲಿ ಮತ್ತು ಸಿಂಹ

*ಕಥಾಕವನ*

*ಇಲಿ ಮತ್ತು ಸಿಂಹ*

ಕಾಡಲಿ ಒಂದು ಮರವಿತ್ತು
ಮರದಡಿ ಸಿಂಹವು ಮಲಗಿತ್ತು
ಬೇಟೆಯನಾಡಿ ಬಳಲಿದ ಸಿಂಹಕೆ
ಸವಿ ಸವಿ ನಿದಿರೆಯು ಆವರಿಸಿತ್ತು||

ಮರದಡಿ ಇಣುಕಿದ ಇಲಿಯೊಂದು
ನೆಗೆಯುತ ಬಂದಿತು ಸಂತಸಗೊಂಡು
ಬಾಲವ ಜಗ್ಗಿ ಮೈಯನು ಏರಿ
ಸಿಂಹದ ಮೇಲೆ ಕುಣಿದಾಡಿತ್ತು||

ಸವಿ ಸವಿ ನಿದ್ದೆಯು ಮುಗಿದಿತ್ತು
ಸಿಂಹವು ಕಣ್ಣನು ತೆರೆದಿತ್ತು
ಬೆನ್ನಿನ ಮೇಲೆ ಕುಣಿಯುತಲಿದ್ದ
ಇಲಿಯನು ಕೈಯಲಿ ಇಡಿದಿತ್ತು||

ಅಯ್ಯೊ ನನ್ನ ಬಿಟ್ಟುಬಿಡು
ಕಾಡಿನ ರಾಜನೆ ದಯೆತೋರು
ತನ್ನಯ ತಪ್ಪನು ಮನ್ನಿಸಿ ಇಂದು
ಬಿಡಲು ಬೇಡಡಿತು ಇಲಿ ನೊಂದು||

ಸಿಂಹಕೆ ಕನಿಕರ ಮೂಡಿತ್ತು
ಕೋಪವು ಮೆಲ್ಲನೆ ತಗ್ಗಿತ್ತು
ಕಷ್ಟದಿ ನಿನ್ನನು ಕಾಪಾಡಿಹೆನು
ಬದುಕಿಕೊ ಎಂದು ಬಿಟ್ಟಿತ್ತು||

ದಿನಗಳು ಹಾಗೆಯೇ ಉರುಳಿದವು
ಸಿಂಹಕೆ ಹಸಿವು ಒಂದು ದಿನ
ಬೇಟೆಯನಾಡುತ ಸಿಂಹವು
ಒಂದು ಬಲೆಯಲಿ ಸಿಕ್ಕಿ ನರಳಿತ್ತು||

ಇಲಿಯದು ಛಂಗನೆ ಹಾರಿತ್ತು
ಬಲೆಯಲಿ ಸಿಂಹವ ಕಂಡಿತ್ತು
ಹಲ್ಲಲಿ ಬಲೆಯನು ಕಡಿದು ಹಾಕಿ
ಸಿಂಹದ ಜೀವ ಉಳಿಸಿತ್ತು||

ಸಿಂಹಕೆ ಸಂತಸವಾಗಿತ್ತು
ಇಲಿಯನು ಮುದ್ದಿಸಿ ನಲಿದಿತ್ತು
ಒಬ್ಬರಿಗೊಬ್ಬರು ನೋವಲಿ ನಲಿವಲಿ
ಬೆರೆವುದೇ ಜೀವನ ಎಂದಿತ್ತು||


✍ವೆಂಕಟೇಶ ಚಾಗಿ
ಲಿಂಗಸುಗೂರ
(ಚಿತ್ರ ಕೃಪೆ :- ಅಂತರ್ಜಾಲ)

ಗಾಂಧೀಜಿ ( ಶಿಶುಗೀತೆ )

***ಗಾಂಧೀಜಿ**

**ಗಾಂಧೀಜಿ**

ಗಾಂಧೀಜಿ ಗಾಂಧೀಜಿ
ಎಲ್ಲರ ತಾತ
ಗಾಂಧೀಜಿ |
ಸ್ವಾತಂತ್ರ್ಯ ಕೊಡಿಸಿದ
ಗಾಂಧೀಜಿ |
ದೇಶಕೆ ದುಡಿದನು
ಗಾಂಧೀಜಿ |
ಅಹಿಂಸೆ ಸಾರಿದ
ಗಾಂಧೀಜಿ |
ರಾಷ್ಟಪಿತನು
ಗಾಂಧೀಜಿ |
ನಮ್ಮಯ ನೆಚ್ಚಿನ
ಗಾಂಧೀಜಿ ||

✍ ವೆಂಕಟೇಶ ಚಾಗಿ

ಚಂದಮಾಮ

**ಚಂದಮಾಮ**

ಅಂದದ ಚಂದದ
ಚಂದಾಮಾಮ
ಬರುತಾನ ನೋಡು
ನಮ್ಮ ಜೊತೆಗೆ
ಬರುತಾನ ನೋಡು..||

ಕರೆದರೆ ಮನೆಗೆ
ಬರುತಾನ
ಬೆಳದಿಂಗಳನು
ತರುತಾನ
ಅಮ್ಮನ ತುತ್ತನು
ತಾನು ತಿಂದು
ಖುಷಿಯ ನಮಗೆ
ಕೊಡುತಾನ..||

=>ವೆಂಕಟೇಶ ಚಾಗಿ
ಲಿಂಗಸುಗೂರ

ಮಂಗ & ಬೆಕ್ಕುಗಳು ( ಕಥಾಕವನ )

*ಕಥಾಕವನ*

💐*ಮಂಗ & ಬೆಕ್ಕುಗಳು* 💐

*ಇಬ್ಬರ ಜಗಳದಿ*
*ಯಾರಿಗೆ ಲಾಭವು*
*ಬನ್ನಿರಿ ನಾವು ತಿಳಿಯೋಣ*
*ನೀತಿಯ ಸಾರುವ*
*ಕಥೆಯನು ಕೇಳಿ*
*ಜೀವನ ಸುಂದರಗೊಳಿಸೋಣ||*

*ಸುಂದರವಾದ ಊರಿನಲಿ*
*ಬೆಕ್ಕುಗಳೆರಡು ಜೊತೆಯಲ್ಲಿ*
*ಆಡುತಲಿದ್ದವು ಅಲೆಯುತಲಿದ್ದವು*
*ಬದುಕುತಲಿದ್ದವು ಸಂತಸದಿ||*

*ಹಸಿವನು ನೀಗಲು ಒಂದುದಿನ*
*ಬೆಕ್ಕುಗಳಿಗೆ ಅದು ಸುದಿನ*
*ಪ್ರತಿಮನೆಯಲ್ಲೂ ಬೆಣ್ಣೆಕದ್ದವು*
*ಮರದಡಿ ಬಂದು ಸೇರಿದವು||*

*ಬೆಣ್ಣೆಯ ಆಸೆ ಹೆಚ್ಚಾಯ್ತು*
*ಇಬ್ಬರ ಜಗಳವು ಶುರುವಾಯ್ತು*
*ನನಗೂ ಜಾಸ್ತಿ ನಿನಗೂ ಜಾಸ್ತಿ*
*ಬೆಣ್ಣೆಯು ಗೆಳೆತನ ಕೆಡಿಸಿತ್ತು||*

*ಮರದಲಿ ಕುಳಿತಿರೊ ಮಂಗಣ್ಣ*
*ನೋಡುತಲಿದ್ದನು ಜಗಳವನ್ನ*
*ಉಪಾಯ ಹೂಡಿ ಮರದಿಂದಿಳಿದು*
*ಬೆಣ್ಣೆಯ ಹಂಚುವ ಮಾತಾಡಿತ್ತು||*

*ತನ್ನಿರಿ ಒಂದು ತಕ್ಕಡಿಯ*
*ಮಾಡುವೆ ಬೆಣ್ಣೆ ಹಂಚಿಕೆಯ*
*ಮಂಗನ ಮಾತನು ನಂಬಿದ ಗೆಳೆಯರು*
*ತಂದವು ತಕ್ಕಡಿ ಜೊತೆಗೂಡಿ||*

*ತೂಗಿದ ಬೆಣ್ಣೆಯ ಮಂಗಣ್ಣ*
*ಹೆಚ್ಚಿನ ಬೆಣ್ಣೆಯ ನುಂಗಣ್ಣ*
*ಆ ಕಡೆ ಜಾಸ್ತಿ ಈ ಕಡೆ ಕಡಿಮೆ*
*ಬೆಣ್ಣೆಯ ನುಂಗಿದ ಮಂಗಣ್ಣ||*

*ಮರವನು ಏರಿದ ಮಂಗಣ್ಣ*
*ಪೆದ್ದ ಗೆಳೆಯರ ನೋಡಣ್ಣ*
*ಇಬ್ಬರ ಜಗಳದಿ ಯಾರಿಗೋ ಲಾಭ*
*ಈ ಕಥೆ ನೀತಿಯ ತಿಳಿಯಣ್ಣ||*


✍ *ವೆಂಕಟೇಶ ಚಾಗಿ*
*ಲಿಂಗಸುಗೂರ*